الخطوة الأولى
نص كيلو ملوخية
منغسلا منيح و منغلي مياه ومننزل بالملوخية عليها وبس تغلي غلوة منطفي تحتا وبعد ساعة منصفيا ومنتركا على جنب ليجي دورا ولا تخافوا لا رح تشط ولا رح تمط
الخطوة التانية
كيلو سفن دجاج او أفخاد حسب الرغبة منحطو بمياه باردة ومنرش ملح حسب الرغبة و منشغل النار لتطلع الزفرة وبس نقشا مننزل بالمطيبات يلي هنن: بصلة ورقتين غار عود قرفة بس.
وبس يستوي الدجاج منشيلو من المي ومنفصل اللحم عن العضم ومنتركن على جنب ليجي دورن
الخطوة التالتة
بطنجرة على نار متوسطة مننزل
بصلة صغيرة ناعمة
معلقة دبس فليفلة
٥ حصوص توم مهروس خشن
معلقة كزبرة كبيرة
معلقة سمنة
معلقتين زيت
منقلي ما سبق لحتى يدبلوا وبعدها مننزل بقطع الدجاج المسلوق ومنقلبن منيح لياخدو لون اشقر
مننزل بالملوخية على دفعات وكل دفعة منضفلا شوية زيت ومنقلبا منيح مع الجاج والتوم والبصل هيك لتخلص كمية الملوخية
وبعدا منكون محضرين مياه مغلية مننزل بكمية المياه لتغمر الملوخية ومنرش ملح حسب الرغبة ومنضيف نص معلقة بهار كبسة وهاد سر لا تقولوه لحدا
ومنغطيها ومنتركا تغلي شي نص ساعة.
وبهالوقت منحضر الرز بشعيرية بمرقة الدجاج
الخطوة الرابعة والأخيرة
منحضر راس توم مهروس ناعم مع معلقة كزبرة وعصير ليمونيتن ومعلقتين دبس رمان وهاد سر كمان ومنضيفن عالملوخية ومنتركا تغلي شي ١٠ دقايق على نار هادية.
وصحتين وهنا.
1,376 total views
